प्रवक्ता खडगबहादुर विश्वकर्मा साधारण तारेखमा छुटे
सर्वोच्च अदालतले नेत्र विक्रम चन्द नेतृत्वको नेपाल कम्युनिस्ट पार्टी नेकपाका प्रवक्ता खडगबहादुर विश्वकर्मालाई साधारण तारेखमा रिहा गर्न आदेश दिएको छ । योसँगै उनी छुटेका छन् । न्यायाधीशद्धय दीपकुमार कार्की र बमकुमार श्रेष्ठको इजलाशले विहिबार विश्वकर्मालाई तारेखमा रिहा गर्न आदेश दिएको हो ।
बन्दी प्रत्यक्षीकरणको रिट निवेदनको सुनुवाई गर्दै कार्की र श्रेष्ठको ईजलाशले विश्वकर्मासहित दोलखाका लोकेन्द्र दर्नाल र राजनप्रसाद लम्साललाई पनि रिहा गर्न आदेश दिएको छ । विश्वकर्मालाई काभ्रे सदरमुकाममा रहेको कुन्साङ लामाको क्रसरमा आगजनी गरेको अभियोगमा प्रहरीले पक्राउ गरेको थियो ।
भदौ १ गते सर्वाेच्च अदालत परिसरबाट दोस्रो पटक उनी पक्राउ परेका थिए । उनलाई गैरकानूनी रुपमा पक्राउ गरेको र गैरन्यायिक तरिकाले थुनामा राखिएको भन्दै विरेन्द्र विकले रिहाइको माग गरी आइतबार सर्वोच्चमा बन्दी प्रत्यक्षीकरण रिट दर्ता गराएका थिए ।
न्यायाधीश ईश्वर खतिवडाको एकल इजलासले पक्राउ गर्नुको लिखित कारणसहित बन्दीलाई उपस्थित गराउन विपक्षीको नाममा आदेश जारी गरेको थियो । सर्वोच्चको आदेशपछि उनलाई वुधबारै सर्वोच्चमा पेश गरिएको थियो ।
साउन २२ गते हेटौडाबाट फर्किँदै गर्दा प्रहरी अनुसन्धान व्यूरोको टोलीले उनलाई चन्दा असुली गरेको र आपराधिक गतिविधि गरेको भन्दै पक्राउ गरेको गरेको थियो । उनका छोरा नरेन्द्रबहादुर विकले सर्वोच्चमा बन्दी प्रत्यक्षीकरणको रिट दर्ता गरेपछि सर्वोच्चले उनलाई रिहा गर्न आदेश दिएको थियो ।
तर, उनलाई काभ्रेको क्रसर उद्योगमा आगजनी गरेको घटनासँग जोडेर राष्ट्रिय मानवअधिकार आयोगका सदस्य सुदिप पाठकसमेत रहेको गाडीबाटै काठमाडौं प्रहरीले पक्राउ गरी काभ्रे प्रहरीलाई बुझायो । एकैसाथ पक्राउ परेका हरिचन्द्र आचार्य र चालक मनबहादुर श्रेष्ठलाई प्रहरीले त्यही दिन छाडिदियो ।
