सुन तस्कर नेकपाका जिल्ला सदस्य ? इन्द्रावती नदीमा अवैध क्रसर उद्योग सञ्चालक पनि
नेकपाका जिल्ला कमिटीहरु धमामध चयन हुन थालेका छन् । एमाले–माओवादी केन्द्र एकता प्रक्रिया टुंगो लगाउने क्रममा जिल्ला कमिटीहरु धमाधम पुनर्गठन भइरहेका छन् । यसैक्रममा सिन्धुपाल्चोक जिल्ला कमिटीमा सुन तस्करीदेखि नेताका स्वकीय सचिवसम्म परेका छन् । नेकपाले सिन्धुपाल्चोक जिल्ला कमिटीमा सुनतस्करीमा मुछिएका राजकुमार पौडेललाई राखेकोमा कार्यकर्ता पंक्ति नै चकित परेको छ ।
विगतदेखि नै तस्करी ब्यापारीमा संलग्नहरुलाई पूर्व माओवादी नेतृत्वले सदस्य बनाएको हो । प्रहरीको केन्द्रीय अनुसन्धान ब्युरोले २०७४ भदौ १५ मा केरुङ र तातोपानी नाकाबाट भित्रिएको २२ किलोमध्ये १५ किलो सुनसहित ७ जना पक्राउ गरेको थियो ।
ती अभियुक्तले सुन तस्करका नाइके राजकुमार पौडेल रहेको बयान दिएलगत्तै उनी बिदामा बसेर सम्पर्कविहीन भएका थिए । उनी भारत पलायन भएका थिए । तिनै पौडेललाई नेकपाको जिल्ला सदस्य बनाइएको छ । पौडेल गएको बर्ष सम्पन्न स्थानीय तहको निर्वाचनमा माओवादीको तर्फबाट भोटेकोशी गाउँपालिकाको अध्यक्षमा निर्वाचित भएका थिए ।
पूर्व माओवादीका विवादित नेता माधव सापकोटा र सरल सहयात्री पौडेलका ब्यवसायिक साझेदार राजकुमार पौडेल युद्धकालमा पनि माओवादीले लुटेको रकम सञ्चालन गर्ने ब्यक्ति हुन् भन्ने गरिन्छ । त्यसकारण पनि भोटेकोशी गाउँपालिकाको अध्यक्षका उम्मेदवार वनाएका सापकोटा र सरलले उनै राजकुमार मार्फत् ब्यवसाय गर्दै आएका छन् ।
प्रहरीको सीआईबीले अनुसन्धान गर्दा माधव सापकोटा र सरलको पनि नाम मुछिएको पाइएपछि उक्त घटनामा राजकुमार पौडेललाई जोगाएर उनका सहयोगी मात्र पक्राउ गरिएको थियो । राजकुमार पौडेलकै गाडीमा पक्राउ परेका शेर्पा थरका ती ब्यक्ति अहिले पनि कारागारमा नै छन् ।
तर, माओवादीका नेता भएका कारण जनार्दन शर्मा गृहमन्त्री भएका बेला माधव सापकोटा र सरल सहयात्री पक्राउ पर्नबाट बचेका थिए । त्यसो त भूमिगतकालदेखि नै माओवादीको संरक्षणमा ब्यापार ब्यवसाय र तस्करी गर्दै आएका राजकुमार पौडेलसँग अहिले पनि देखावटी ब्यवसायको रुपमा क्रसर उद्योग छ ।
इन्द्रावती नदीमा अवैध क्रसर उद्योग सञ्चालनमा हाल नेकपाका केन्द्रीय सदस्य बनेका माधव सापकोटाको प्रत्यक्ष संरक्षण रहेको छ । नेकपाको केन्द्रीय सदस्यको रवाफ देखाउँदै यस क्षेत्रका क्रसर उद्योगमा अबैध रुपमा वालुवा गिटी उठाउँदा पनि प्रशासन चुप लागेर वसेको छ । गृहमन्त्री रामबहादुर थापाको नाम भजाएर यो समूहले अत्याधिक नदी दोहन गरिरहेका छन् । तर पनि कुनै कारबाही भएको छैन ।
बिगतदेखि नै विवादास्पद भूमिकाका माओवादीका यी नेताहरुले तत्कालीन माओवादीका अध्यक्ष पुष्पकमल दाहालका बडीगार्ड युवराज दुलालमार्फत् प्रहरी प्रशासनमा प्रभाव पारेर तस्करीका काम गर्दै आएका थिए । २०६४ को भदौतिर ६ गाडी रक्तचन्दन खासातर्फ लैजाँदा पनि माधव सापकोटा, सरल सहयात्री र युवराज दुलालको संलग्नता थियो ।
झण्डै ६० करोड रुपैयाँ पर्ने उक्त रक्तचन्दन वाटोमा स्थानीयले अवरोध खडा गरेपछि प्रहरीले पक्राउ गर्न लागेको थियो । तर, माधव सापकोटा, दुलाल र सरलले पेस्तोल देखाएर रक्तचन्दन पार गराइदिएका थिए । सो बापत राजकुमार पौडेलले साझेदार बनाएका उनै नेता नजिकका ब्यक्तिहरुले वाह्रविसे वजारमा रक्सीको चुस्कीसँगै खुलासा गरेका थिए ।
बाह्रबिसे इलाका प्रहरी कार्यालयका तत्कालीन प्रहरी निरीक्षक वीरेन्द्रवहादुर शाहीलाई खरिद गरेर सो रक्तचन्दनको गाडी अवरोध गर्ने स्थानीयलाई पेस्तोल पड्काएर लखेटिएको थियो । त्यसो त सो बेला सिन्धुपाल्चोकका पत्रकार ग्याम्लिङ लामाले फोटो खिच्दा क्यामेरा खोसेर फुटाइएको थियो ।
पूर्व माओवादीमा यसरी नवप्रवेशी र तस्करीहरु हावी भएपछि युद्ध लडेकाहरु निराश बनेका छन् । पूर्वमाओवादीमा सापकोटावाद हावी भएपछि अरु कार्यकर्ताहरुमा भने निराशा छाएको छ । तथापि नेकपाको योजना सफल पार्न भने एकवद्ध हुनेमा उनीहरु लागिरहेका छन् ।
केरुङ र तातोपानी नाकाबाट भित्रिएको २२ किलो सुन काठमाडौंमा रहेको सूचनाका आधारमा २०७४ भदौ १५ मा ब्युरोको टोली खोजीमा खटिएको थियो । टोलीले सोही दिन टोखा नगरपालिका–११ बाट १४ किलो सुनसहित पेम्बा दोर्जे शेर्पालाई पक्राउ ग¥यो ।
उनले २ किलो सुन जनकपुर पु¥याएको बयान दिएपछि धनुषा प्रहरीको सहयोगमा एक किलो सुनसहित दीपककुमार साह पक्राउ परे । साहको पक्राउपछि एक किलो सुन भारत पुगेको खुल्यो । बाँकी ६ किलो सुन कहाँ छ भन्ने एक बर्ष बित्न लाग्दा पनि खुलेको छैन ।
