ठुला दल मधेश पसे, एमालेले संबिधान बोक्यो,राजपालाइ मधेश जान कसले रोक्यो

हाम्रो इकोनोमि

यस अघि भएको स्थानीय तहको चुनाबमा ठुलो दल बनेको एमालेले असोज २ गते हुने २ नम्बर प्रदेशका ८ जिल्लालाइ टार्गेट बनाएको छ।त्यसका लागि एमालेका नेताहरुले २ नम्बर प्रदेशलाइ मुकाम बनाएर जित आफ्नो पोल्टामा पार्ने कसरत गरिरहेको छ। राजपाका नेताहरुले एमालेलाई मधेशमा पस्न नदिने बताएका बेला एमालेले मधेशमा राम्रो उपस्थिती देखाएको छ। अहिलेदेखि नै जनमत आफ्नो पक्षमा पार्ने रणनीति अख्तियार गर्दै आएको एमालेले त्यहाँ नया नया अभियान संचालन गरिरहेको छ।

दुई नम्बर प्रदेशका सिराहा, सप्तरी, मोहत्तरी, धनुषा, सर्लाही, रौतहट, बारा र पर्सामा एमाले केन्द्रीय सचिवालयले शीर्ष नेताहरुलाई चुनावको तयारीमा खटाए पछि केन्द्रिय राजनीतिमा तरंग उत्पन्न भएको छ। रौतहटमा पूर्व प्रधानमन्त्री समेत रहेका एमाले नेता माधब नेपाल नेपाली भाषामा भएको संबिधान उल्था गर्दै त्यहाँका मधेशी समुदायलाई विभेद नभएको बुझाउदै हिड्न थालेका छन। संविधान साथमा लिएर हिँडेका उनले केही दल र नेताहरुले संविधानले विभेद गरेको भन्दै अफवाह फैलाएको आरोप लगाएका छन् । संविधान संशोधनको विपक्षमा उभिँदै आएको एमालेले संविधानमा व्यवस्था गरिएका मधेश र मधेशीलगायतको हक अधिकारका बारेमा गाउ गाउ पुगेर जानकारी गराउन थालेको हो।

एमालेले प्रदेश नम्बर २ को वीरगञ्ज, जनकपुर र लहानमा केन्द्रीय सचिवालय खोलेर एमालेले आठ जिल्लामा चुनावी रणनीति बनाउन लागेको हो। प्रभाब शाली नेता सबै मधेश झरेर आफ्नो पक्षमा माहोल बनाउन जुटिरहेका बेला सत्ताधारी दलका नेता भने राजधानीमा थुप्रिएका छन। एमालेले महासचिव ईश्वर पोखरेलको कमाण्डमा पार्टी पदाधिकारीलाइ मधेशमा पठाएको हो।

महासचिव पोखरेलले वीरगञ्जमा बसेर चुनावी रणनीति बनाउँदै पर्सा जिल्ला हेर्नेछन् । यस्तै उपमहासचिव बिष्णु पौडेल बारा र अर्का उपमहासचिव घनश्याम भुसाल रौतहटमा खटिने एमालेले जनाएको छ । मैथिली भाषामा पोख्त नेताहरु गाउ गाउमा पुगेर जनता संग साक्षात्कार गर्दैछन।
सचिवहरु गोकर्ण विष्ट सर्लाही, योगेश भट्टराई धनुषा, पृथ्वीसुब्बा गुरुङ महोत्तरी, भीम आचार्य सप्तरी, प्रदिप ज्ञवाली सिराहामा खटिएका छन भने
२ नम्बर प्रदेश संयोजक सत्यनारायण मण्डल, सहसंयोजक नागेन्द्र चौधरीलगायतका नेताहरु पनि आबश्यकता अनुसार अन्य जिल्लामा चुनाबी अभियानमा होमिएका छन। मानसरोबर बाट आज राजधानी आइपुगेका अध्यक्ष केपी ओली पनि केहि दिनमा मधेश झर्दै छन।

अवको स्थानीय तह निर्वाचनमा नेकपा एमाले भन्दा एक स्थान भएपनि बढि जित्ने अभियानमा रहेको नेपाली कांग्रेसले केन्द्रीय समिति बैठकबाटै पार्टीका नेताहरुलाई चुनावी अभियानमा खटाउने निर्णय गरिसकेको छ । कांग्रेसले साउन १९ गते जनकपुरमा बिशेष भेला राखेको छ । सो भेलामा पार्टी सभापति तथा प्रधानमन्त्री शेरबहादुर देउवालगायतका शीर्ष नेताले सम्बोधन गर्ने कांग्रेसले जनाएको छ ।

यस्तै रामचन्द्र पोडेल नेतृत्वको निर्वाचन परिचालन कमिटि अन्तर्गतको रमेश लेखक नेतृत्वको प्रचारप्रचार उपसमितिको टोली पनि अहिले २ नम्बर प्रदेशका जिल्लामा पुगेर चुनावी तयारी र अपनाउनुपर्ने सावधानीका बारेमा अध्ययन गरिरहेको छ । सो टोलीले गत साउन १४ गते नै जनकपुरमा पुगेर आठै जिल्लाका आफ्ना पार्टीका जिल्लासभापतिहरुसँग छलफल गरिसकेको प्रचारप्रसार उपसमितिका संयोजक रमेश लेखकले बताए । लेखक नेतृत्वको टोली काठमाडौ फर्कैलगत्तै कांग्रेसको अर्को टोली २ नम्बर प्रदेशमा खटिने कांग्रेस केन्द्रीय कार्यलयका प्रकाश शर्माले बताए । कांग्रेसले यो प्रदेशमा एमालेबाहेकका शक्तिसँग चुनावी तालमेल गर्नसक्ने सो दलका नेताहरुले बताउँदै आएका छन् ।

त्यस्तै एमाले र कांग्रेसको तुलनामा पहिलो र दोस्रो स्थानीय निर्वाचनमा कम मत र कम स्थानीय तह जितेको माओवादी केन्द्र पनि आक्रामक शैलीमा २ नम्बर प्रदेशमा चुनाव जित्ने अभियान अन्र्तगत सोमबारबाटै लागिसकेको छ । सो पार्टीले आज सोमबार २ नम्बर प्रदेशको चुनावी तयारीस्वरुप जनकपुरमा प्रशिक्षण कार्यक्रम आयोजना गरेको छ ।
प्रदेशस्तरीय अगुवा कार्यकर्तालाई प्रशिक्षण दिन माओवादी केन्द्रका अध्यक्ष पुष्पकमल दाहाल लगायतका शीर्षस्थ नेता सोमबार जनकपुर पुगिसकेका छन् । जानकी वाटीकामा दिउँसोबाट सुरु हुने प्रशिक्षणमा ८ जिल्लाबाट ६ सयजना अगुवा कार्यकर्ता सहभागी हुने माओवादीले जनाएको छ । अध्यक्ष दाहालकै नेतृत्वमा २ नम्बर प्रदेशमा चुनावी अभियान चलाउने माओवादीले जनाएको छ । जनकपुरपछि अन्य जिल्लामा पनि प्रशिक्षण र भेलालगायतका कार्यक्रम निरन्तर गर्ने माओवादी केन्द्रका प्रवक्ता पम्फा भुषालले जानकारी दिइन् ।

मधेस केन्द्रीत दल राजपाले भने अझैसम्म असोज २ मा हुने स्थानीय तह निर्वाचनमा सहभागि हुने या नहुने भन्ने निर्णय गरिसकेको छैन । उसले यसअघि सरकारसँग राखेका माग पुरा नगरेको भन्दै स्थानीय तह निर्वाचनमा सहभागि हुनबाट रोकिएको गुनासो गरिरहेको छ । यद्यपी सरकारले राजपाका केही माग पुरा गरेको र केही प्रकृयामा रहेकाले राजपा निर्वाचनमा आउने विश्वास व्यक्त गर्दै आएको छ । पछिल्लो समय राजपाका नेताहरुले संविधान संशोधन प्रस्ताव संसदको प्रकृयामा लैजान माग गर्दै आएको छ ।