‘१८२५ दिनमा काठमाडौंलाई नमूना महानगर बनाउँछौं’



नेपाली कांग्रेसकी नेतृ हरिप्रभा खड्गी काठमाडौं महानगरपालिकाको उपमेयर हुन् । लामो राजनीतिक यात्रापछि नेपाली कांग्रेसले उनलाई राजधानीको उपमेयरको उम्मेदवार बनाएपछि भारी मतले विजयी हुन सफल भएकी छन् । नेपालका अधिकांश जिल्ला पुगेर सबै अनुभव बटुलेकी हरिप्रभाले पहिलो तहको स्थानीय निर्वाचनमा ५८ हजार ९ सय ५२ मत प्राप्त गरी आफ्ना प्रतिद्वन्द्वी राप्रपाका राजाराम श्रेष्ठलाई २४ हजार भन्दा बढी मतले पछाडि पार्दै विजयी भइन् ।नवनिर्वाचित उपमेयर हरिप्रभा श्रेष्ठसँग महानगरका समस्या र समाधानका विषयमा गरेको कुराकानी यहाँ प्रस्तुत गरिएको छ ।

कार्यभार सम्हालेको भोलिपल्टै कुच्चो बोकेर सडकमा निस्कनु भयो प्रचारप्रसारका लागि कि साँच्चै सरसफाइमा निस्किनु भएको हो ?

हामीले निर्वाचनका बेला मतदातासँग मत माग्दा राजधानीको सरसफाईका विषयमा कुरा उठाएका थियौं । तपाईँले भनेजस्तै हामी कुच्चो लिएर सडकमा आएको सांकेतिक रुपमा जनतालाई चेतनशील बनाउनका लागि हो । फुक्ला आदर्शलाई जनताले पत्याउदैन भन्ने मलाई राम्रोसँग हेक्का र ज्ञान दुबै छ ।

  • आफ्नो विजयलाई कसरी लिनु भएको छ ?

म राजनीतिमा प्रवेश गरेदेखि देशका ६५ जिल्ला जति घुमेर महिलालाई प्रशिक्षण दिने काम गरे । महिलाको राजनीतिमा सकृय सहभागिता नरहेसम्म देश विकास हुन सक्दैन भनेर महिलालाई चेतनशील पनि बनायौँ । समग्रमा भन्नुपर्दा यो जितलाई मैले निरन्तरताको प्रतिफलको रुपमा लिएकी छु । एमालेले राप्रपासँग तालमेल गरेर मत बिक्री गर्दासम्म काठमाण्डौंका जनताले विश्वास गरेर मलाई भारी मतले विजयी गराउनुभयो त्यसका लागि म धन्यवाद दिदै ऋणि भएको महसुश गरेकी छु ।

तपाईँको प्राथमिकतामा के के काम परेका छन् ?

महिला उद्यमी भएर आर्थिक रुपमा आत्मनिर्भर नहुँदासम्म अघि बढ्न कठिन छ । त्यसैले मेरो प्राथमिकतामा महिलालाई सबल र सक्षम उद्यमी बनाउने हो । सबल उद्यमी बन्न मानिस स्वास्थ्य रहन जति आवश्यक छ त्यसका लागि काठमाडौंलाई धुँवा धुलोरहित बनाउनु पर्छ । अब हामीले आदर्श छाँट्दै कथा र टुक्का हालेर हुँदैन जनताले देख्ने गरी काम गर्नुपर्छ त्यो म गरेर देखाउने छु ।

राजधानीलाई हराभरा बनाउने सपना पनि मतदातालाई बाँड्नु भएको थियो कसरी बनाउनु हुन्छ ?

मैले आफूले गर्न नसक्ने हावादरी गफ मतदातासँग गरेकी छैन । काठमाडौंलाई हराभरा बनाउन पहिला त जनचेतना कार्यक्रम नै हुनुपर्छ । त्यसपछि समूदायसँग हातेमालो गर्दै एक आपसी भाईचाराको सम्बन्ध बनाएर काठमाडौंलाई हाराभरा बनाउने हो । यति मात्र होइन राजधानीमा रहेको अव्यवस्थित पार्किङलाई व्यवस्थापन गरी स्थायी सामाधान गर्नुपर्ने अर्को चुनौति छ । चुनौतीसँग डराएर होइन जुधेर सामना गर्ने हो । व्यवस्थित स्थायी पार्किङ्ग पनि बनाउने हो ।

तपाईँले तीनकुनेमा भएको जग्गालाई उपयोग गर्ने भन्नुभएको थियो त्यसलाई के गरेर उपयोग गराउनु हुन्छ ?

हो मैँले चुनावमा तीनकुनेको ५२ रोपनी जग्गा र अन्य पर्ती जग्गामा पार्क बनाउने भनेकी थिएँ त्यो कामको थालनी छिट्टै गरिने छ । काठमाडौंलाई हराभरा बनाउन छिमेकी राष्ट्र दिल्लीमा जसरी रुख रोपिएको छ त्यसैगरी यहाँ पनि बनाउन सकिन्छ ।

महानगरको सबैभन्दा ठूलो समस्या भनेको पिउने पानी हो त्यसको व्यवस्थापन गर्न केही योजना छ ?

यो महानगरको मात्रै समस्या नभएर मुलुककै समस्या हो । काठमाडौंमा केही महिनापछि वितरण हुने मेलम्चीको पानीले हदैसम्मको समस्यालाई समाधान गर्छ मेलम्चीको पानी पर्याप्त भएन भने श्रोतको खोजी गरी प्राथमिकताका साथ काम गरिनेछ ।

मेयर पदमा विपक्षी पार्टीका व्यक्ति हुनुहुन्छ तपाईँले सोचे र चाहेजस्तो गरी काम गर्ने वातावरण बन्छ भन्ने कुरामा कति ढुक्क र आशावादी हुनुहुन्छ ?

राजनीतिक पार्टी, सिद्धान्त र दर्शन हाम्रा छुट्टाछुट्टै भए पनि सामाजिक संस्थामा प्रवेश गरेपछि विकास गर्ने विचार एउटै हुनुपर्छ । मेयर विद्या –विद्यासुन्दर शाक्य० जीले पनि विकासकै नारा दिएर जित्नु भएकोले विकास र महानगरलाई निकास दिने कुरामा उहाँ तगारो बन्नुहोला भन्ने मलाई लाग्दैन । मेयरको मात्र कुरा होइन सबै पार्टीका नेताहरुसँग समन्वय र छलफल गर्दै वडाबाट निर्वाचित भएका साथीहरुसँग समेत काँधमा काँध मिलाएर काम गर्नुपर्छ भन्ने मेरो मान्यता हो ।

महानगरपालिकाभित्र भ्रष्टाचारको जालो मौलाएको भनिन्छ त्यसको जरो काट्न सक्नुहृुन्छ ?

अवको विकास भनेको आर्थिक निकास हो । आर्थिक निकासलाई सवल र सक्षम बनाउनका लागि भ्रष्टाचारमा शुन्य सहनसिलता हुन आवश्यक छ । तपाईँले भने जस्तै गरी साथीहरुले मलाई पनि सुनाएका छन् । भ्रष्टाचार भनेको आर्थिक मात्रै होइन जनतालाई दिने सेवा र सुविधामा गरिने ढिलाई पनि भ्रष्टाचार हो । हामीले आर्थिक भ्रष्टाचारीदेखि कामचोर भ्रष्टाचारीलाई समेत प्रमाणको आधारमा कारबाही गर्नेछौं ।

काठमाडौंमा रहेको अर्को विकराल समस्या भनेको सार्वजनिक यातायात हो यसलाई व्यवस्थापन गर्ने केही उपाय छ ?

जहाँ समस्या, त्यहाँ उपायको खोजी भईरहन्छ । तपाइले भनेझैँ सार्वजनिक यातायातको समस्या ज्यादै ठूलो छ । यसकारण कयौं दिदीबहिनीहरुले यात्रा गर्दा अनेक हिंसा सहनु परेको छ । यसको सरलीकरणका लागि साना यातायात हटाएर ठूलो गाडी भित्राउनु पर्छ । व्यवस्थित पार्किङ्ग र गाडीले मान्छे कुर्ने प्रवृत्तिलाई हटाएर मान्छेले गाडी कुर्ने स्थिती बनायौं भने केहि समस्या समाधान हुन्छ भन्ने मलाई लागेको छ ।

काठमाडौंमा रेल कुदाउने कुरा पनि निर्वाचनमा जोडतोडले उठाइएको थियो रेल कुदाउन सम्भव देख्नुहुन्छ ?

अहिले भइरहेको विज्ञानको विकासले असम्भव भन्ने केही छैन । काठमाडौंमा रेल दौडाएर देखाउने हामीले प्रतिबद्धता देखाएका छौँ त्यो प्रतिबद्धतालाई पुरा गराएरै छाड्छौं ।

पाँच वर्षको कार्यकालमा महानगरलाई कस्तो बनाउने सपना देख्नुभएको छ ?

महानगरलाई साच्चीकै नमुना बनाउने हो भने जनताको साथ चाहिन्छ । जनताले हामीले भनेझै साथ दिए भने उनीहरुसँग हातेमालो गर्दै नमुना महानगर मात्र नभएर सानो युरोप बनाउने सपना मैले देखेकी छु ।

 

प्रतिक्रिया दिनुहोस
बूढानीलकण्ठका जनता हाम्रो पक्षमा छन् : मिठाराम अधिकारी

    बूढानीलकण्ठ नगरपालिकाका जनताले तपाईंलाई आफ्नो प्रतिनिधिको रुपमा निर्वाचित गनुपर्ने कारणहरु के–के

बाँकी काम पूरा गर्न मेरो उम्मेदवारी हो : अशोक ब्याञ्जु

      पाँच वर्ष प्रमुख भएर काम गरिसक्नु भएको छ, राष्ट्र तथा

यो वर्षको क्यान इन्फोटेक मेला फरक र तीव्र प्रभावी बनाइने छ : नवराज कुँवर, अध्यक्ष, (क्यान महासंघ)

    नेपालमा मेला र महोत्सवहरूको शुरूवात गर्ने सम्भववतः पहिलो संस्था कम्प्युटर एसोसिएशन

महासचिव भन्दा तल चुनाव लड्दिन : नेता पाण्डे

    एमालेको दसौं महाधिवेशन मूल व्यवस्थापन समितिको सह–संयोजक हुनुहुन्छ, तयारी कस्तो छ